SALAMU ZA RAMBIRAMBI MSIBA WA ELIZABETH MAYEMBA

 Mhariri:Herman Kihwili. IMEWEKWA.JULY 10,2016 SAA 01:23 USIKU

Blog ya Jamii na Michezo inaungana na wapenda michezo Tanzania pamoja na Rais wa Shirikisho la Mpira wa Miguu
Tanzania (TFF), Jamal Malinzi kwa kutumia salamu za rambirambi kwa wanamichezo wote nchini na kwa Mwenyekiti wa Chama cha Waandishi wa Habari za Michezo Tanzania (TASWA), Juma Pinto kutokana na kifo cha Elizabeth Mayemba - Mwandishi wa Habari za Michezo wa Gazeti la Majira.

Rais Malinzi amesema, amepokea taarifa za kifo cha mwandishi huyo mwandamizi wa habari za michezo nchini kilichotokea Julai 09, 2016 na habari zake kuanza kusambaa majira ya jioni jana kabla ya kuthibitishwa na wanafamilia na uongozi wa TASWA kupitia njia mbalimbali za mawasiliano.

Salamu za rambirambi za Rais wa TFF Malinzi pia zimekwenda kwa familia ya marehemu, ndugu, jamaa na marafiki na kuwataka kuwa na moyo wa subira wakati huu mgumu wa msiba wa Elizabeth Mayemba.

Elizabeth Mayemba, wakati wa uhai wake alikuwa na mchango mkubwa katika tasnia ya habari za michezo akitoa mawazo yake hivyo ameacha alama ya ucheshi, kujituma na uwajibikaji katika kufanikisha kazi zake katika gazeti la Majira na wakati fulani magazeti ya Kampuni ya New Habari House 2006.

Lakini pia uongozi wa Kampuni ya Business Times Limited (BTL), inayozalisha Magazeti ya Business Times, Majira na Spoti Starehe,alipokuwa anafanyafanyakazi Elizabeth Mayemba,imetoa taarifa juu ya misiba huo.

Elizabeth Mayemba ambaye ni Kaimu Mhariri wa Michezo Gazeti la Majira alikutwa na mauti Jumamosi ya Julai 9, 2016 saa 2 usiku, akiwa nyumbani kwake Tabata Kisukulu, Dar es Salaam.

Kabla ya kukutwa na mauti, marehemu alifanya kazi zake na majukumu yote ya kila siku bila kuonesha dalili za kuumwa.

Akiwa nyumbani kwake saa 2 usiku, alijisikia vibaya na kukimbizwa hospitali ya Amana, akiwa njiani alikutwa na mauti.

Kwa mujibu wa familia ya marehemu, Elizabeth Mayemba atazikwa siku ya Jumanne ya Julai 12, 2016, mkoani Morogoro kwenye Makaburi ya Kola.

Elizabeth Mayemba ataagwa Jumatatu ya Julai 11, 2016 saa 5.00 asubuhi nyumbani kwake Tabata Kisukulu. Baada ya Misa mwili utasifirishwa kwenda Morogoro kwa mazishi.

Taarifa zaidi zitaendelea kutolewa kila mara ili kuwapa nafasi watu wengi wajue ratiba zote zilivyopangwa.

Kampuni imepata pigo kubwa kwa kuondokewa na Elizabeth Mayemba, ambaye mchango wake ulikuwa mkubwa zaidi na ulioonekana kwa kila mtu. Marehemu ameacha mume na watoto watatu wa kiume.

Mungu Ailaze roho ya Marehemu mahali pema peponi. Amina

Meneja Mkuu

Business Times Limited

KWA TAARIFA,BREAKING NEWS,RATIBA PAMOJA NA MATOKEO YA MECHI MBALIMBALI,LIKE PAGE YA FACEBOOK  BONYEZA HAPA (Jamii na Michezo) .

Share